加入 CK 團隊
呢頁唔係想將保險行講到好易做，亦唔係想話你知人人都適合入行。 寫畀轉行、初入行、或者做緊保險但想換一個做法嘅人—— 盡量將現實講清楚，等你自己判斷。
↓ 睇清楚先好約我
我喺保險家庭長大，見過呢行最好同最差嘅一面。
見過一份當年認真安排嘅保障，喺屋企人生病、離世、退休嗰陣，令一家人行得過本來好難行嘅關口。 亦見過相反嘅情況：當初冇人講清楚，保障有缺口，家人要自己硬食本來可以分擔嘅重量。
問題從來唔喺保險本身，而喺行業一啲舊做法——靠熟人市場、用話術代替專業、 用短期成交取代長期信任，招募嗰陣就將門檻講到好低、將現實講到好輕。
我自己由 cold market 起步，冇靠熟人市場，慢慢建立咗一套可以持續運作嘅客戶開發系統—— 由陌生接觸，到建立信任，到轉介紹。呢個過程慢，但個底穩，而且係可以教、可以傳承嘅。 呢個團隊想做嘅，就係將呢套方法傳落去，搵真係想喺呢行長遠做嘅人。
佢會放大一個人嘅本質。
好多人俾呢行吸引，係因為收入彈性同發展空間。呢樣嘢係真嘅，唔使避談—— 對願意承擔結果、想突破收入上限嘅人嚟講，呢行確實有吸引力。
但如果淨係當佢係一份高佣金工作，理解就太淺。呢份工真正難嘅地方， 係佢會不斷放大你嘅本質：自律程度、情緒穩定性、表達能力、俾人拒絕之後嘅反應、 肯唔肯持續修正自己——全部會喺工作入面顯現得好清楚。
保險唔係一份可以匿喺制度後面嘅工。做得好唔好，好多時冇得假裝。 正因為咁，佢唔適合所有人；但對適合嘅人嚟講，係一份好有延展性、值得認真經營嘅事業。
我會提供咩，同我唔會做咩。
首年學習框架
入行後每個階段你都知道自己做緊咩、咩進度屬於正常、下一步係咩。唔係「跟住感覺行」。
頭幾次見客，我陪你去
喺真實情境入面學點介紹保障、點處理疑問、點面對拒絕。唔係淨係坐喺課室度聽。
定期一對一跟進
幫你將問題拆清楚，搵出卡住嘅位。唔係開大會嗌口號。
唔會日日催你
呢份工需要內在驅動。長期靠外部壓力先郁得手嘅人，喺呢行好難行得遠。
唔會幫你包裝一個唔誠實嘅形象
唔會教你將現實講輕啲，亦唔會教你整一個唔真實嘅人設。客戶嘅信任應該建立喺真實上面。
唔會保證你照做就一定成功
我可以幫你少行冤枉路。最終行到幾遠，仍然取決於你自己。
唔要求你有 sales 背景，唔要求你識好多人。
我哋更在意嘅係：一個人喺冇底薪、冇人日日催嘅環境下，仲穩唔穩定到向前行。 具體啲講，係呢四樣嘢——
TRAIT / 01
接受延遲回報
呢份工嘅回報，好多時唔會喺你努力嗰日出現。只能靠即時回報維持動力嘅人，通常喺見到成果之前已經放棄咗。
TRAIT / 02
願意主動開口，唔怕被拒絕
主動接觸、願意跟進、俾人拒絕之後繼續行——呢啲係呢份工冇得迴避嘅日常。
TRAIT / 03
重視誠實，包括對自己誠實
邊啲保障適合、邊啲唔適合、邊啲情況唔應該勉強成交，呢啲都要講得出口。
TRAIT / 04
有基本自律
冇固定時間表、冇打卡制度。你自己最清楚，喺呢種環境下你係咪穩定到。
兼職可以，但有條問題你要自己答。
我哋接受兼職加入。但都見過好多例子：兼職嘅同事好難真正投入，最後兩邊都做唔好。
有條好簡單嘅問題，值得你自己諗清楚：一個客戶揀保險顧問嗰陣， 會唔會想搵一個兼職做呢行嘅人？佢日後有理賠問題、有保障疑問嗰陣， 希望搵到嘅係一個全心投入，定係分身兼顧嘅顧問？
呢個唔係批評兼職嘅選擇。只係想你清楚：喺能力積累、客戶信任、長遠發展空間上， 全職同兼職嘅結果通常差好遠。全職投入、有心建立自己團隊嘅同事， 我哋會投放更多資源同時間——呢個唔係唔公平，係資源有限之下應有嘅分配。
由傾偈到上牌，一共五步。
- 01
確認基本資格
DSE 五科第 2 級或以上（包括中文、英文、數學），或者副學士 / 大學畢業。呢個係牌照申請嘅制度要求，冇得傾。
- 02
先了解，再正式交流
深入傾之前，先睇清楚呢頁講嘅做法同要求。雙方期望愈早講清楚，之後合作基礎愈穩固。
- 03
雙向面談
唔只係我評估你，你都應該評估我。你想清楚嘅問題，面談嗰陣全部可以問。
- 04
考牌
卷一（保險原理）同卷三（人壽保險），MC 題，灣仔電腦應試即時出結果。整體合格率低過一半，建議預至少五日認真備考——團隊有課程同模擬試題。入職六個月內再補卷二、卷四、卷五。
- 05
上牌之後，先係真正開始
培訓、陪同見客、定期跟進，按首年框架一步步行。框架我哋預備好，行唔行到係你嘅部分。
讀到呢度仲想傾，我哋可以坐低講。
面談係雙向嘅：我了解你嘅背景同諗法，你都可以問你想問嘅嘢。 唔需要一開始已經好勁，但需要願意面對現實、持續投入， 同埋用誠實嘅方式對待客戶同自己嘅工作。
@ck.keepgrowing ・ 每年只收 3 個人